Semanjai 2012 JKM udah ngungkup RM136.2j ngagai 51,157 iku penerima

NGARAPKA LANTANG SENANG: Taib nyuaka duit enggau baju raya ngagai seiku penerima ke sama dikemataka Rohani (kiba).

KUCHING: Sarawak, menua ke dua pengabis besai, nangkan Sabah nerima ungkup nengah program Pengelantang Pendiau Rayat 1Malaysia tauka Kar1sma, Opis Pengelantang Pendiau Raban Bansa (JKM) ke meri ungkup urung RM136.2 juta ngagai 51,157 iku penerima sepemanjai taun 2012.

Menteri Pengintu Pengelantang Raban Bansa, Orang Indu enggau Pemansang Ruang Bilik (KPWKM) Datuk Rohani Abdul Karim madah kelimpah ari bantu nya, Program Transformasyen Perintah (GTP) ti dipunka dalam taun 2009, udah meri kelala ‘Bidang Keberkasilan Utama Negara’ (NKRA): Ngangkatka Tikas Pengelantang Pendiau Ruang Bilik ke kurang penatai pemisi (LIH).

Iya madah, inisiatif ti diangkat KPWKM kena mantu komuniti ke ngembuan penatai pemisi mit, ke ulih dikena ngangkatka pemisi diri sebilik lalu pansut ari gaya pendiau penyeranta.

“Sebengkah inisiatif ti digaga nengah NKRA LIH kena mantu orang baka tu, iya nya Program 1AZAM. Program tu bepalanka chara pengelantang pendiau ke produktif enggau chara nyendiaka peluang ngulihka pemisi, baka pengawa dagang, servis, pengawa betanam betupi sereta pengawa bukai,” ku iya.

Iya madah baka tu lebuh bejaku ba atur pengawa Berbuka Puasa Kar1sma Ramadan ke bisi nyamu urung 2,000 raban OKU, anak patu balu enggau orang tuai di Palan Aum Besai Borneo Kuching (BCCK) ditu, malam hari Minggu tu tadi.

Rohani nambah, ke timpuh Januari 2010 ngagai 31 Disember 2012, Program 1Azam udah mandangka penyentuk program tu enggau pemayuh orang ke masuk program tu manggai 106,967 di serata menua.

Ari penyampau nya ku iya, menua Sarawak ngerikd penyampau kedua pengabis besaiut pemayuh 20,901 penyereta.

Ba atur pengawa Berbuka Puasa nya mega, Taib diberi basa nyua ‘duit raya’ enggau baju raya ngagai urung 440 penerima ke mayuh ari sida ke dikemerat KPWKM baka anak mit, orang tuai, OKU enggau penerima bantu bukai.

Sama bisi nguluka atur pengawa nya, malam hari Minggu tu tadi, iya nya temuai ti dibasa, Kepala Menteri Sarawak Pehin Sri Abdul Taib Mahmud enggau bini iya, Puan Sri Ragad Kurdi-Taib, Menteri Pengelantang Pendiau, Orang Indu enggau Pemansang Ruang Bilik, Datuk Fatimah Abdullah, enggau Speaker Kunsil Nengeri, Datuk Amar Asfia Awang Nassar enggau bini iya, Datin Amar Fatimah Iskandar.

Source: sabah & sarawak news